Club 9806
- District 1360
- Charter number
Rótarýklúbbur Ísafjarðar var stofnaður 20.
október 1937. Er klúbburinn annar elsti Rótarýklúbbur landsins, en
Rótarýklúbbur Reykjavíkur var stofnaður 3 árum fyrr. Núverandi félagar eru um
20.
Klúbbfundir
eru í hverri viku í Vestrahúsinu á Ísafirði nema í júlí og ágúst. Þar snæða félagarnir
saman, ræða málefni klúbbsins og Rótarýhreyfingarinnar og hlýða á fróðleg erindi,
sem klúbbfélagar, eða einhverjir á vegum þeirra, flytja.
Rótarýklúbbar
eru starfsgreinaklúbbar. Er þá reynt að hafa á að skipa félögum af öllum kynjum
úr sem flestum starfsgreinum á starfssvæðinu. Starfssvæði klúbbsins er
norðanverðir Vestfirðir. Klúbburinn stendur ekki fyrir reglulegum fjáröflunum, eða
peningasöfnunum, en fjármagnar verkefni sín sjálfur að mestu. Hann getur sótt
um styrki til einstakra verkefna hjá Rotaryumdæminu á Íslandi og í Alþjóða
Rotarysjóðinn.
Rótarýklúbburinn hefur unnið að
mörgum samfélagsverkefnum frá stofnun. Á heimsvísu tekur hann m.a. þátt í að
útrýma lömunarveiki og mörgum öðrum þjóðþrifaverkefnum í gegnum Alþjóðlega
Rótarýsjóðinn. Hann hefur með hléum um langt árabil stundað skógrækt. Má geta
þess, að klúbburinn hafði forgöngu um stofnun Skógræktarfélags Ísafjarðar á
sínum tíma og átti frumkvæði að skógræktinni innan við Stórurð, fyrir ofan
eyrina á Ísafirði.
Víða í nágrenni Ísafjarðar eru
örnefnaskilti, sem klúbburinn setur upp og viðheldur. Efst á Arnarnesinu er
útsýnisskífa, sem klúbburinn kom upp fyrir margt löngu. Mörg gömul og sögufræg
hús á Ísafirði hafa verið merkt með skiltum, þar sem heitum þeirra og sögu er
getið í nokkrum orðum. Önnur
skiltaverkefni eru í vinnslu.
Í
Karlssárskógi fyrir neðan veginn upp á Seljalandsdal á Ísafirði er klúbburinn
að hefja langtímaverkefni um gerð útivistarsvæðis fyrir almenning í samráði við
Skógræktarfélagið og Ísafjarðarbæ.
Í
samvinnu við Tónlistarskóla Ísafjarðar stendur klúbburinn fyrir nokkrum tónleikum
tónlistarnemenda á hjúkrunarheimilinu Eyri á Ísafirði. Stefnt er að útvíkkun til
nágranna sveitarfélaga. Á Ísafirði veitir hann verðlaun tengd námsárangri í
Grunnskólanum á Ísafirði.
Rótarýfélagar
sækja gjarnan fundi í Rótarýklúbbum þar sem þeir eru staddir fjarri
heimahögum. Eru þeir auðfúsugestir hvar sem er í heiminum og er afar fróðlegt
og skemmtilegt að kynnast Rótarýfélögum í fjarlægum löndum á þann hátt.
